بچوں میں ڈپریشن اور اینگزائٹی خاموش ذہنی مسائل

تحریر:سیدہ مناحل راحیل

بچہ ہنستا ہوا اچھا لگتا ہے، کھیلتا ہوا اچھا لگتا ہے، مگر کبھی آپ نے غور کیا ہے کہ جو بچہ اچانک خاموش ہو گیا ہے، جو بچہ ہر وقت ڈرا ڈرا رہتا ہے، جو بچہ بات بات پر رو دیتا ہے، وہ دراصل اندر سے ٹوٹ رہا ہوتا ہے؟

ہم اکثر سمجھتے ہیں کہ ڈپریشن اور اینگزائٹی صرف بڑوں کو ہوتی ہے۔ بڑوں کو نوکری کا ٹینشن ہوتا ہے، پیسوں کی فکر ہوتی ہے، اس لیے وہ پریشان ہوتے ہیں۔ مگر سچ یہ ہے کہ بچے بھی ڈپریشن کا شکار ہوتے ہیں، فرق صرف اتنا ہے کہ بڑے بول کر بتا دیتے ہیں اور بچہ بول نہیں پاتا۔

بچوں میں ڈپریشن اور اینگزائٹی شور نہیں مچاتی، یہ خاموشی سے آتی ہے اور بچے کے دل و دماغ کو اندر ہی اندر کھا جاتی ہے۔ بچہ چیختا نہیں، روتا نہیں، وہ بس خاموش ہو جاتا ہے۔ اور ہم اس خاموشی کو بدتمیزی، ضد یا سستی سمجھ کر نظر انداز کر دیتے ہیں۔

ایک خاموش بچے کی کہانی:

ذرا سوچیں، ایک 8 سال کا بچہ ہے۔ پہلے وہ بہت ہنستا تھا، کھیلتا تھا، سب سے بات کرتا تھا۔ پھر آہستہ آہستہ وہ بدل گیا۔ اب وہ کونے میں بیٹھا رہتا ہے، کسی سے بات نہیں کرتا، سکول جانے پر روتا ہے۔ ماں کہتی ہے اسے نظر لگ گئی ہے، باپ کہتا ہے یہ ضد کر رہا ہے، استاد کہتا ہے یہ پڑھائی میں کمزور ہے۔

مگر کوئی یہ نہیں پوچھتا، بیٹا تمہیں کیا ہوا ہے؟ تم اتنے خاموش کیوں ہو گئے ہو؟

یہی ہمارا سب سے بڑا مسئلہ ہے۔ ہم بچے کے نمبر دیکھتے ہیں، اس کے کپڑے دیکھتے ہیں، اس کا کھانا دیکھتے ہیں، مگر اس کا دل نہیں دیکھتے ۔

بچوں میں ڈپریشن کی خاموش نشانیاں:

بچہ کبھی سیدھا نہیں کہے گا مجھے ڈپریشن ہے۔ وہ اپنی تکلیف ان نشانیوں سے بتائے گا.

بچہ کبھی سیدھا نہیں کہے گا مجھے ڈپریشن ہے۔ وہ اپنی تکلیف ان نشانیوں سے بتائے گا:

1. ہر وقت اداس رہنا، کھیلنے میں دل نہ لگنا

2. چھوٹی چھوٹی بات پر رونا یا بہت زیادہ غصہ کرنا

3. اکیلے بیٹھنا، دوستوں سے دور بھاگنا، کسی سے بات نہ کرنا

4. نیند کا خراب ہونا، رات کو ڈر کر اٹھ جانا، برے خواب آنا

5. کھانا کم کھانا یا بہت زیادہ کھانا

6. سکول جانے سے ڈرنا، پڑھائی میں دل نہ لگنا، نمبر گر جانا

7. بار بار پیٹ یا سر میں درد کی شکایت کرنا، حالانکہ ڈاکٹر کہے سب ٹھیک ہے

8. خود کو برا سمجھنا، میں اچھا نہیں ہوں، سب مجھ سے نفرت کرتے ہیں کہنا

9. ہر وقت تھکا تھکا رہنا، کسی کام میں دل نہ لگنا

10. چھوٹی سی غلطی پر بھی بہت زیادہ ڈر جانا

یہ سب ضد یا بدتمیزی نہیں ہے، یہ مدد کی پکار ہے۔ بچہ کہہ رہا ہے، مجھے سمجھو، مجھے بچاؤ۔

بچوں میں اینگزائٹی کیوں ہوتی ہے؟

بچے کا دماغ ایک نرم مٹی کی طرح ہوتا ہے۔ اس پر جو نشان لگ جائے، وہ ساری زندگی رہتا ہے۔

بچہ جب ہر وقت ڈانٹ سنتا ہے، جب اسے طعنے ملتے ہیں، جب اس کا دوسرے بچوں سے موازنہ کیا جاتا ہے، جب گھر میں ہر وقت لڑائی ہوتی ہے، جب اسے پیار کی بجائے خوف ملتا ہے، تو اس کے دل میں ایک مستقل ڈر بیٹھ جاتا ہے۔

وہ سوچنے لگتا ہے کہ اگر میں نے غلطی کی تو مجھے مار پڑے گی، اگر میں نے نمبر کم لیے تو سب مجھ سے نفرت کریں گے، اگر میں نے بولا تو سب میرا مذاق اڑائیں گے۔ یہی ڈر آہستہ آہستہ اینگزائٹی بن جاتا ہے۔

کبھی کبھی بچہ اس لیے بھی ڈرا رہتا ہے کہ اسے گھر میں وہ پیار نہیں ملا جس کا وہ حقدار تھا۔ ماں باپ موبائل میں مصروف ہیں، ایک دوسرے سے لڑ رہے ہیں، اور بچہ کمرے کے کونے میں اکیلا بیٹھا سوچ رہا ہے کہ میری غلطی کیا ہے؟

موبائل اور تنہائی نے بچوں کو اور اکیلا کر دیا

پہلے بچہ روتا تھا تو ماں گود میں اٹھا لیتی تھی۔ اب بچہ روتا ہے تو اس کے ہاتھ میں موبائل دے دیا جاتا ہے۔ بچہ چپ تو ہو جاتا ہے، مگر اس کا دل اور زیادہ اکیلا ہو جاتا ہے۔

موبائل بچے کو خاموش تو کر دیتا ہے، مگر اس کی تنہائی کو ختم نہیں کرتا۔ بچہ کارٹون دیکھتا ہے، گیم کھیلتا ہے، مگر اندر سے وہ کسی ایسے انسان کو ڈھونڈ رہا ہوتا ہے جو اس سے پوچھے، بیٹا تم ٹھیک ہو؟ بچہ روتا تھا تو ماں گود میں اٹھا لیتی تھی۔ اب بچہ روتا ہے تو اس کے ہاتھ میں موبائل دے دیا جاتا ہے۔ بچہ چپ تو ہو جاتا ہے، مگر اس کا دل اور زیادہ اکیلا ہو جاتا ہے۔

موبائل بچے کو خاموش تو کر دیتا ہے، مگر اس کی تنہائی کو ختم نہیں کرتا۔ بچہ کارٹون دیکھتا ہے، گیم کھیلتا ہے، مگر اندر سے وہ کسی ایسے انسان کو ڈھونڈ رہا ہوتا ہے جو اس سے پوچھے، بیٹا تم ٹھیک ہو؟

سکول اور استاد کا کردار

کچھ بچے سکول میں بھی ڈرے رہتے ہیں۔ استاد کی ایک ڈانٹ، دوستوں کا مذاق، فیل ہونے کا ڈر، یہ سب بچے کے دل میں اینگزائٹی پیدا کر دیتا ہے۔

اگر کوئی بچہ کلاس میں خاموش بیٹھا ہے، سوال نہیں پوچھ رہا، تو اس کا مطلب یہ نہیں کہ وہ نالائق ہے۔ ہو سکتا ہے وہ ڈرا ہوا ہو کہ اگر میں نے غلط جواب دیا تو سب ہنسیں گے۔

استاد کو چاہیے کہ وہ ایسے بچے کو پیار سے بلائے، اس کی حوصلہ افزائی کرے، اسے یہ یقین دلائے کہ غلطی کرنا بری بات نہیں ہے۔

والدین کی چھوٹی غلطیاں، بڑا زخم:

سمجھتے ہیں بچہ بھول جاتا ہے، مگر بچہ کچھ نہیں بھولتا۔ ایک سخت جملہ، ایک تھپڑ، ایک بے عزتی، بچے کے ذہن پر سالوں تک رہتی ہے۔

تم سے تو کچھ نہیں ہوتا، تم نالائق ہو، تم ہماری عزت خراب کرو گے، یہ جملے ماں باپ کے لیے عام ہوتے ہیں، مگر بچے کے لیے یہ زہر ہوتے ہیں۔ بچہ ان جملوں کو سچ سمجھ لیتا ہے اور ساری زندگی خود کو ناکام سمجھتا رہتا ہے۔

بچے کو ضرورت مار کی نہیں، سمجھ کی ہے۔ اسے ضرورت ڈانٹ کی نہیں، گلے لگانے کی ہے۔ اسے ضرورت طعنوں کی نہیں، حوصلے کی ہے ۔

حل کیا ہے؟ بچے کو کیسے بچائیں؟

1. بچے کو سنیں: روز کم از کم 15 منٹ صرف اس کی بات سنیں، موبائل کے بغیر۔ اس سے پوچھیں آج سکول میں کیا ہوا؟ آج تم خوش ہو یا اداس ہو؟

2. موازنہ بند کریں: کبھی اسے دوسرے بچوں سے مت ملائیں۔ ہر بچہ الگ ہوتا ہے، ہر بچے کی اپنی خوبی ہوتی ہے۔

3. پیار سے سمجھائیں: غلطی پر ڈانٹنے کی بجائے پیار سے سمجھائیں۔ بچے کو یہ لگے کہ غلطی کرنے پر بھی اس کے ماں باپ اس کے ساتھ ہیں۔

4. خوف کا ماحول ختم کریں: گھر میں بچے کے سامنے لڑائی مت کریں۔ بچہ لڑائی دیکھ کر اندر سے ٹوٹ جاتا ہے۔

5. حوصلہ دیں: چھوٹی کامیابی پر بھی شاباش دیں۔ شاباش بچے کے لیے دوائی سے زیادہ اثر کرتی ہے۔

6. کھیلنے کا وقت دیں: بچے کو کھیلنے دیں، مٹی میں کھیلنے دیں، دوستوں کے ساتھ وقت گزارنے دیں۔ کھیل بچے کی بہترین تھراپی ہے۔

7. ماہر سے مدد لیں: اگر بچہ بہت زیادہ خاموش، ڈرا ہوا یا اداس ہے تو شرمائے بغیر کسی ماہر نفسیات سے ملیں۔ یہ کمزوری نہیں، یہ سمجھداری ہے۔ جیسے بخار کے لیے ڈاکٹر کے پاس جاتے ہیں، ویسے ہی ذہنی تکلیف کے لیے بھی ڈاکٹر کے پاس جانا چاہیے ۔

آخری بات:

بچے کا بچپن اس کی پوری زندگی کی بنیاد ہے۔ اگر بنیاد میں خوف، اداسی اور تنہائی ہوگی تو بڑی عمارت بھی کمزور ہوگی۔ اور اگر بنیاد میں پیار، اعتماد اور سکون ہوگا تو بچہ ساری زندگی مضبوط رہے گا۔

آج اپنے بچے کو گلے لگائیں، اس سے پوچھیں بیٹا تم کیسے ہو؟ تمہیں کسی بات نے پریشان تو نہیں کیا؟ ہو سکتا ہے وہ اسی ایک سوال کا برسوں سے انتظار کر رہا ہو۔

یاد رکھیں، خاموش بچہ بدتمیز نہیں ہوتا، وہ زخمی ہوتا ہے۔ اس کے زخم کو سمجھیں، اس کا علاج کریں، اس سے پہلے کہ یہ خاموشی پوری زندگی کا اندھیرا بن جائے۔

بچے کو بچپن دیں، خوف نہیں۔ پیار دیں، ڈر نہیں۔ کیونکہ آج کا خوش بچہ ہی کل کا مضبوط انسان بنے گا۔